Este 30 de maio a clase obreira vai á folga xeral en Euskadi. Vai contra a política dun goberno da dereita reaccionaria que quere facer pasar por futuro un retorno ás condicións dun pasado de miseria e superexplotación baixo a ditadura da patronal e o capital financeiro. Pero tamén contra dunha práctica sindical e política de pactismo social que en boa medida é corresponsábel xunto á crise sistémica do capitalismo, da situación actual de liquidación das conquistas de dereitos e condicións laborais, económicos e sociais dos traballadores e traballadoras.
Este pactismo pretende reeditarse mediante novos acordos antiobreiros en materias como o desemprego xuvenil, o sistema público de pensións e a negociación colectiva, coas consecuencias de destrución de postos de traballo e substitución polo subemprego, a quita ás pensións actuais e o impedimento e rebaixa na percepción das futuras, e a imposición da “paz social” da desmobilización fronte á chantaxe da “retroactividade” da táboa rasa no contido dos convenios colectivos. É lavarlle a cara á dereita no poder facendo méritos para poder manter o devalado papel de interlocutores dunhas incorrixíbeis direccións sindicais traidoras aos intereses de clase.
Os CUO-GALIZA non só apoiamos a folga senón que por solidariedade de clase facemos desta data unha xornada de loita en Galiza e en todo o estado, coa perspectiva da intensificación da mobilización obreira, da confluencia das loitas sectoriais en curso, e de novas convocatorias de FOLGA XERAL que demanda unha Clase Obreira cansa ata a enchente de contemporizacións.
Avanzaremos nesta liña se somos quen de artellar a UNIDADE DE CLASE, por riba de siglas pero con obxectivos de loita, desde a base dos centros de traballo e as asembleas obreiras para superar tanto os diques da división como o desnorte traizoeiro. Porque a loita por rematar con estas políticas é a loita para derrocar desde as rúas ao goberno autor das mesmas, sen apegos legalistas.
CONTRA O PACTO SOCIAL E O CAPITAL!!
